Author: News Admin

അഞ്ചുതെങ്ങ്: ശ്രീ ജ്ഞാനേശ്വര ക്ഷേത്രത്തിലെ വനിതകളുടെ പങ്കാളിത്തം ശക്തിപ്പെടുത്തുന്നതിനും ക്ഷേത്രത്തിന്റെ പ്രവർത്തനങ്ങളിലും വികസനകാര്യങ്ങളിലും വനിതകളുടെ സജീവസാന്നിധ്യം ഉറപ്പാക്കുന്നതിനുമായി വനിതാവേദി രൂപീകരിക്കുന്നു.ഇതിന്റെ ഭാഗമായി ഒക്ടോബർ 13ന് ചൊവ്വാഴ്ച വൈകുന്നേരം നാലിന് ക്ഷേത്രാങ്കണത്തിൽ വനിതാവേദി രൂപീകരണ യോഗം നടക്കും. ഗുരുദേവക്ഷേത്രം, ഗണപതി–മുരുക ക്ഷേത്രം എന്നിവയുടെ നിർമ്മാണം ഉൾപ്പെടെയുള്ള ക്ഷേത്ര വികസന പ്രവർത്തനങ്ങളിൽ വനിതകളുടെ പങ്കാളിത്തം ഉറപ്പാക്കുകയാണ് യോഗത്തിന്റെ ലക്ഷ്യം. ക്ഷേത്രത്തിന്റെ വിവിധ പ്രവർത്തനങ്ങളിൽ വനിതകളുടെ സഹകരണം വർധിപ്പിക്കുന്നതിനും കൂട്ടായ്മ ശക്തിപ്പെടുത്തുന്നതിനും യോഗം പ്രാധാന്യം നൽകും. ക്ഷേത്ര കമ്മിറ്റിയുടെ നേതൃത്വത്തിൽ നടക്കുന്ന യോഗത്തിലേക്ക് എല്ലാ വനിതാ ഭക്തജനങ്ങളെയും സ്നേഹപൂർവം ക്ഷണിക്കുന്നതായി ക്ഷേത്ര കമ്മിറ്റി ജനറൽ സെക്രട്ടറി അറിയിച്ചു.

ആറ്റിങ്ങൽ: ഇടിമിന്നലേറ്റ് സഹോദരങ്ങൾക്കു പരിക്കേറ്റു. കടയ്ക്കാവൂർ പഞ്ചായത്ത് പരിധിയിലെ കീഴാറ്റിങ്ങൽ മണ്ണറ എസ്.ബി.ഭവനിൽ ബിന്ദുലേഖ (53), സഹോദരൻ സതികുമാർ (60) എന്നിവർക്കാണ് പരിക്കേറ്റത്. ഗുരുതരമായി പരിക്കേറ്റ ബിന്ദുലേഖ തിരുവനന്തപുരത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തിൽ ചികിത്സയിലാണ്. വ്യാഴാഴ്ച വൈകുന്നേരം 4.40 നായിരുന്നു സംഭവം. വീടിനു പുറത്ത് മുൻവശത്തുള്ള വരാന്തയിലിരുന്ന് ബിന്ദുലേഖയും സഹോദരങ്ങളും ചേർന്ന് പൂക്കൾ കെട്ടുന്നതിനിടെയാണ് ഇടിമിന്നലേറ്റത്.ബിന്ദുലേഖയുടെ നെഞ്ചിലും കൈയിലും ഗുരുതരമായി പൊള്ളലേറ്റു. സതികുമാറിന്റെ കാലിലെ മസിലിൻ്റെ മർമ്മഭാഗത്താണ് പൊള്ളലേറ്റത്. സംഭവത്തെത്തുടർന്ന് ഇരുവരെയും ആറ്റിങ്ങലിലെ സ്വകാര്യ ആശുപത്രിയിൽ പ്രവേശിപ്പിച്ചു. പരിക്ക് ഗുരുതരമായതിനാൽ ബിന്ദുലേഖയെ വിദഗ്ധ ചികിത്സയ്ക്കായി തിരുവനന്തപുരത്തെ സ്വകാര്യ ആശുപത്രിയിലേക്ക് മാറ്റുകയായിരുന്നു. ബിന്ദുലേഖ നിലവിൽ തീവ്രപരിചരണ വിഭാഗത്തിൽ ചികിത്സയിൽ തുടരുകയാണ്. സതികുമാറിനെ പിന്നീട് കൊട്ടിയത്തെ സ്വകാര്യ ആശുപത്രിയിലേക്കും മാറ്റി.

വർക്കല: ശിവഗിരി മഠം ജംഗ്ഷനിൽ പുലർച്ചെ വാഹനം നിയന്ത്രണം വിട്ട് ബസ് കാത്തിരിപ്പ് കേന്ദ്രത്തിലേക്ക് ഇടിച്ചുകയറി. വ്യാഴാഴ്ച പുലർച്ചെ 5.20ഓടെയാണ് അപകടം നടന്നത്. വാഹനം ഓടിച്ചിരുന്ന അന്യസംസ്ഥാന തൊഴിലാളി ഉറങ്ങിപ്പോയതിനെ തുടർന്ന് വാഹനത്തിന്റെ നിയന്ത്രണം നഷ്ടപ്പെട്ടതാണ് അപകടത്തിന് കാരണമെന്നാണ് പ്രാഥമിക വിവരം. നിയന്ത്രണം വിട്ട വാഹനം ജംഗ്ഷനിലെ ബസ് കാത്തിരിപ്പ് കേന്ദ്രത്തിലേക്ക് ഇടിച്ചുകയറുകയായിരുന്നു.അപകടം നടന്നത് പുലർച്ചെയായതിനാൽ ബസ് കാത്തിരിപ്പ് കേന്ദ്രത്തിൽ ആളുകൾ ഉണ്ടായിരുന്നില്ല. സാധാരണ സമയങ്ങളിൽ യാത്രക്കാർ ഉണ്ടാകാറുള്ള ബസ് സ്റ്റോപ്പിലേക്കാണ് വാഹനം ഇടിച്ചുകയറിയത്. പുലർച്ചെയായിരുന്നതിനാൽ വൻ ദുരന്തമാണ് ഒഴിവായത്. അപകടത്തിൽ ബസ് കാത്തിരിപ്പ് കേന്ദ്രത്തിനും വാഹനത്തിനും കേടുപാടുകൾ സംഭവിച്ചു.സംഭവത്തെ തുടർന്ന് വർക്കല പോലീസ് വാഹനം കസ്റ്റഡിയിലെടുത്തു അപകടത്തിന്റെ സാഹചര്യങ്ങൾ സംബന്ധിച്ച് പോലീസ് പരിശോധന നടത്തിവരികയാണ്.

വർക്കല: ഇടവയിൽ കാൽനടയാത്രക്കാരിയെ ഇടിച്ചുതെറിപ്പിച്ച ശേഷം കാർ നിർത്താതെ കടന്നുകളഞ്ഞു. ഇടവ ശ്രീയേറ്റ് എ.കെ.ജി നഗറിൽ ഇന്ന് രാവിലെയാണ് സംഭവം. അപകടത്തിൽ ഇടവ മാന്തറ സ്വദേശിനി സൈബുനീസ (78)യ്ക്ക് പരിക്കേറ്റു. റോഡരികിലൂടെ നടന്നുപോകുകയായിരുന്ന സൈബുനീസയെ കാർ തട്ടി തെറിപ്പിക്കുകയായിരുന്നു.അപകടത്തെത്തുടർന്ന് ബോധരഹിതയായി റോഡിൽ കിടന്ന ഇവരെ നാട്ടുകാർ ചേർന്നാണ് ആശുപത്രിയിലേക്ക് മാറ്റിയത്. വർക്കല താലൂക്ക് ആശുപത്രിയിൽ പ്രവേശിപ്പിച്ച ഇവരെ പ്രാഥമിക ശുശ്രൂഷ നൽകിയ ശേഷം സിടി സ്‌കാനിംഗിൽ ആന്തരിക രക്തസ്രാവമുണ്ടായത് കണ്ടെത്തിയതിനെ തുടർന്ന് തിരുവനന്തപുരം മെഡിക്കൽ കോളേജിലേക്ക് റഫർ ചെയ്തു. സംഭവത്തിനുശേഷം കാർ നിർത്താതെ കടന്നുകളഞ്ഞതിനെ തുടർന്ന് പരിസരത്തെ സി.സി.ടി.വി ദൃശ്യങ്ങൾ പരിശോധിച്ചപ്പോഴാണ് അപകടമുണ്ടാക്കിയ വാഹനത്തെക്കുറിച്ച് വിവരം ലഭിച്ചത്. KL 02 BU 7084 നമ്പറിലുള്ള കാറാണ് സൈബുനീസയെ ഇടിച്ചതെന്നാണ് സി.സി.ടി.വി ദൃശ്യങ്ങളിൽനിന്ന് വ്യക്തമായത്. അപകടത്തിനുശേഷം നിർത്താതെ പോയ വാഹനവും, അതിലുണ്ടായിരുന്നവരെയും കണ്ടെത്താനുള്ള ശ്രമത്തിലാണ് അയിരൂർ പോലീസ് .

ആറ്റിങ്ങൽ : എംഡി പത്തോളജിയിൽ കേരള യൂണിവേഴ്സിറ്റി ഹെൽത്ത് സൈൻസിൽ ഒന്നാം റാങ്ക് നേടി ആറ്റിങ്ങൽ മാമം സ്വദേശി ഡോ ആര്യ എസ് നായർ.ചൈതന്യയുടെ കർമ്മ ശ്രേഷ്ഠ പുരസ്കാര ജേതാവ് കൂടിയാണ് ഡോ ആര്യ. മാമം ചൈതന്യ ജംഗ്ഷനിൽ അഭയം വീട്ടിൽശ്രീകണ്ഠൻ നായരുടെയും ബിന്ദുവിന്റെയും മകളാണ്.

കല്ലമ്പലം: കാനഡയിൽ വാഹനാപകടത്തിൽ മലയാളി യുവാവ് മരിച്ചു. നാവായിക്കുളം വെട്ടിയറ മാധവ് ഭവനിൽ പരേതനായ സുകുമാരന്റെയും ഗീതയുടെയും മകൻ സുഗീഷ് (31) ആണ് മരിച്ചത്. കാനഡയിലെ ഒന്റാറിയോ പ്രവിശ്യയിലെ വോൺ നഗരത്തിൽ കീൽ സ്ട്രീറ്റിനു സമീപം കഴിഞ്ഞ ഞായറാഴ്ച പുലർച്ചെയായിരുന്നു അപകടം. ട്രക്ക് ഡ്രൈവറായ സുഗീഷ് ജോലി കഴിഞ്ഞ് വാഹനം പാർക്ക് ചെയ്തശേഷം നടന്നുപോകുന്നതിനിടെ അമിതവേഗത്തിലെത്തിയ കാർ പിന്നിൽനിന്ന് ഇടിക്കുകയായിരുന്നു. ഇടിയുടെ ആഘാതത്തിൽ റോഡിലേക്ക് തെറിച്ചുവീണ സുഗീഷ് സംഭവസ്ഥലത്തുതന്നെ മരിച്ചു. ടൊറന്റോ പോലീസ് ബന്ധുക്കളെ വിവരമറിയിച്ചു. അപകടത്തിൽപ്പെട്ട കാറിന്റെ ഡ്രൈവർ സംഭവസ്ഥലത്ത് തുടരുകയും അന്വേഷണവുമായി സഹകരിക്കുകയും ചെയ്തതായി പോലീസ് അറിയിച്ചു. അപകടത്തെ തുടർന്ന് അരമണിക്കൂറോളം പോലീസ് റോഡ് അടച്ചിട്ടു. മോർച്ചറിയിൽ സൂക്ഷിച്ചിരിക്കുന്ന മൃതദേഹം പോസ്റ്റ്‌മോർട്ടവും മറ്റ് നടപടിക്രമങ്ങളും പൂർത്തിക്ക… കാനഡയിലുള്ള ഭാര്യ മീനു മൃതദേഹത്തെ അനുഗമിക്കും.

വർക്കല: പട്ടാപ്പകൽ വീട് കുത്തിത്തുറന്ന് പത്തര പവൻ സ്വർണാഭരണങ്ങളും 20,000 രൂപയും മോഷ്ടിച്ച കേസിൽ 16-ാം നാൾ പ്രതിയെ പാറശ്ശാലയിൽനിന്ന് വർക്കല പോലീസ് പിടികൂടി. കൊല്ലം കരിക്കോട് പേരൂർ പുത്തൻപുരയിൽ മുഹമ്മദ് ഷെരീഫ് (50) ആണ് പിടിയിലായത്. പ്രതിയിൽനിന്ന് 9.5 പവൻ സ്വർണാഭരണങ്ങളും 1,53,000 രൂപയും കണ്ടെടുത്തു. കുരയ്ക്കണ്ണി ഷൈലാമൻസിലിൽ അജ്മലും മാതാവും താമസിക്കുന്ന വീട്ടിലാണ് മോഷണം നടന്നത്. വീട്ടുകാർ പുറത്തുപോയ സമയത്ത് പിൻഭാഗത്തെ അടുക്കളവാതിൽ തള്ളിത്തുറന്നാണ് മോഷ്ടാവ് അകത്തുകടന്നത്. അലമാരയിൽ സൂക്ഷിച്ചിരുന്ന സ്വർണാഭരണങ്ങളും പണവും നഷ്ടപ്പെട്ടതിനെ തുടർന്ന് വർക്കല പോലീസിൽ പരാതി നൽകുകയായിരുന്നു.വീടിന് സമീപത്തെ സിസിടിവി ദൃശ്യങ്ങളും വിരലടയാളങ്ങളും കേന്ദ്രീകരിച്ച് നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്. മോഷണശേഷം വർക്കലയിൽനിന്ന് ഓട്ടോറിക്ഷയിൽ പാരിപ്പള്ളിയിലെത്തിയ ഇയാൾ ബസിൽ കൊല്ലത്തേക്കും തുടർന്ന് ട്രെയിനിൽ എറണാകുളത്തേക്കും തിരുവനന്തപുരത്തേക്കും പോയി. തിരുവനന്തപുരത്ത് ഒരു സ്വർണാഭരണം വിറ്റശേഷം ലഭിച്ച പണവുമായി ചെന്നൈയിലെത്തി ആഡംബര ജീവിതം നയിച്ചുവരികയായിരുന്നു. ഇതിനിടെ പാറശ്ശാലയിലെത്തിയ പ്രതിയെ വർക്കല പോലീസ് കസ്റ്റഡിയിലെടുത്തു. ജില്ലാ പോലീസ് മേധാവി…

വർക്കല: മാനസിക വെല്ലുവിളി നേരിടുന്ന വയോധികയെ വഴിയിൽ തടഞ്ഞ് വസ്ത്രങ്ങൾ വലിച്ചുകീറുകയും ശാരീരികമായി ഉപദ്രവിക്കുകയും ചെയ്ത കേസിൽ രണ്ടുപേരെ വർക്കല പോലീസ് അറസ്റ്റ് ചെയ്തു. വർക്കല മൈതാനം സ്വദേശികളായ നൗഷാദ് (46), ജയൻ (54) എന്നിവരാണ് അറസ്റ്റിലായത്. ഈ മാസം ഏഴിന് പുലർച്ചെ 5.30-ഓടെയായിരുന്നു സംഭവം. റോഡിലൂടെ നടന്നുപോവുകയായിരുന്ന വയോധികയെയാണ് പ്രതികൾ അതിക്രമത്തിന് ഇരയാക്കിയത്. അവശനിലയിലായ വയോധികയെ തുടർന്ന് ആശുപത്രിയിലേക്ക് മാറ്റി. സംഭവത്തെക്കുറിച്ച് വിവരം ലഭിച്ചതിനെ തുടർന്ന് വർക്കല പോലീസ് നടത്തിയ അന്വേഷണത്തിലാണ് പ്രതികളെ തിരിച്ചറിഞ്ഞ് കസ്റ്റഡിയിലെടുത്തത്. നിയമനടപടികൾ പൂർത്തിയാക്കി പ്രതികളെ കോടതിയിൽ ഹാജരാക്കുമെന്ന് പോലീസ് അറിയിച്ചു.

കടയ്ക്കാവൂർ: കെ.എസ്.ആർ.ടി.സി.യുടെ സ്ത്രീകൾക്ക് സൗജന്യ യാത്ര അനുവദിച്ചിട്ടുള്ള ‘പ്രിയദർശിനി’ ബസ് നിലയ്ക്കാമുക്കിൽ തകരാറിലായതോടെ സ്ത്രീകളും വിദ്യാർത്ഥികളുമടക്കം നിരവധി യാത്രക്കാർ പെരുവഴിയിലായി. വ്യാഴാഴ്ച വൈകിട്ട് 3.30-ഓടെയാണ് തിരുവനന്തപുരം–ആറ്റിങ്ങൽ–വക്കം റൂട്ടിൽ സർവീസ് നടത്തുന്ന ബസ് നിലയ്ക്കാമുക്ക് പള്ളിമുക്ക് ഭാഗത്ത് തകരാറിലായത്. ബസ് പണിമുടക്കിയ സമയത്ത് ശക്തമായ മഴയായിരുന്നതിനാൽ യാത്രക്കാർ ഏറെ ദുരിതത്തിലായി. ബസിലുണ്ടായിരുന്ന സ്ത്രീകളും വിദ്യാർത്ഥികളും മഴയത്ത് ഇറങ്ങി മറ്റ് യാത്രാമാർഗങ്ങൾ തേടേണ്ടിവന്നു. തകരാറിലായ ബസ് ഏറെ നേരം റോഡരികിൽ കിടന്നതും യാത്രക്കാരുടെ ദുരിതം വർധിപ്പിച്ചു. തുടർന്ന് വൈകിട്ട് 6.15-ഓടെയാണ് വർക്ക്ഷോപ്പ് വാഹനം സ്ഥലത്തെത്തി അറ്റകുറ്റപ്പണി നടത്തി ബസ് ഡിപ്പോയിലേക്ക് മാറ്റി. സ്ത്രീകളും വിദ്യാർത്ഥികളും ഉൾപ്പെടെ നിരവധി യാത്രക്കാർ ആശ്രയിക്കുന്ന സർവീസ് തകരാറിലാകുന്നത് യാത്രക്കാരെ ദുരിതത്തിലാക്കുന്നതായി നാട്ടുകാർ പറഞ്ഞു.

ചിറയിൻകീഴ്: ക്ഷേത്രങ്ങളിൽ ശാന്തിയായി ജോലിയിൽ കയറി ഭാരവാഹികളുടെ വിശ്വാസം നേടിയ ശേഷം ക്ഷേത്രമുതലുകൾ കവർന്നെടുക്കുന്നത് പതിവാക്കിയ കുപ്രസിദ്ധ മോഷ്ടാവിനെ ചിറയിൻകീഴ് പോലീസ് അറസ്റ്റ് ചെയ്തു. തൃശ്ശൂർ കണിമംഗലം ദേശത്ത് അയ്യപ്പൻകാവ് റോഡിൽ മാടപ്പറമ്പ് മഠം വീട്ടിൽ വാസുദേവൻ (58) ആണ് അറസ്റ്റിലായത്. ആനത്തലവട്ടം പുട്ടുകട ജംഗ്ഷന് സമീപത്തെ ഭഗവതി ക്ഷേത്രത്തിൽ ശാന്തിക്കാരനായി ജോലി ചെയ്യുന്നതിനിടെ വിഗ്രഹത്തിൽ ചാർത്താനായി സൂക്ഷിച്ചിരുന്ന അരപ്പവൻ വീതം തൂക്കമുള്ള രണ്ട് സ്വർണമാലകൾ മോഷ്ടിച്ചെന്നാണ് കേസ്. മോഷ്ടിച്ച മാലകൾ ധനകാര്യ സ്ഥാപനങ്ങളിൽ പണയപ്പെടുത്തി പണം കൈക്കലാക്കിയ ശേഷം ഇയാൾ കടന്നുകളയുകയായിരുന്നു.തുടർന്ന് മറ്റൊരു ക്ഷേത്രത്തിൽ ശാന്തിയായി ജോലിയിൽ പ്രവേശിക്കാനുള്ള ശ്രമത്തിനിടെയാണ് വാസുദേവൻ പിടിയിലായത്. ഇയാൾക്കെതിരെ അമ്പലപ്പുഴ, ചാലക്കുടി പോലീസ് സ്റ്റേഷനുകളിൽ കേസുകൾ നിലവിലുണ്ടെന്ന് പോലീസ് അറിയിച്ചു.കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ചിറയിൻകീഴ് പോലീസ് സ്റ്റേഷൻ എസ്.ഐ. ശ്രീകുമാർ, എ.എസ്.ഐ. നാസർ ജി, എസ്.സി.പി.ഒ. രാംനാഥ്, സി.പി.ഒമാരായ നാദിർഷ, ശ്രീജിത്ത് എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.