Author: News Admin
വർക്കല: ഓടയം പള്ളിക്ക് സമീപം ബ്രിട്ടീഷ് വനിതയെ ആക്രമിച്ച് ബലമായി പിടിച്ചുകൊണ്ടുപോകാൻ ശ്രമിച്ചെന്ന പരാതിയിൽ യുവാവ് അറസ്റ്റിൽ. ഓടയം സ്വദേശി ഷഹദിനെയാണ് അയിരൂർ പോലീസ് പിടികൂടിയത്. തിങ്കളാഴ്ച പുലർച്ചെ 1.20ഓടെ റസ്‌റ്റാറൻ്റിൽ നിന്ന് ഭക്ഷണം കഴിച്ചശേഷം താമസസ്ഥലത്തേക്ക് പോകവേയാണ് അഞ്ജാതൻ തന്നെ ആക്രമിക്കുകയും തട്ടിക്കൊണ്ടുപോകാൻ ശ്രമിക്കുകയും ചെയ്തെന്നാണ് 53 വയസ്സുള്ള ബ്രിട്ടീഷ് പൗരത്വമുള്ള വനിത വർക്കല ഡെപ്യൂട്ടി സൂപ്രണ്ട് ഓഫ് പോലീസിന് നൽകിയ പരാതിയിൽ പറയുന്നത്. വർക്കലയിൽ 20 വർഷക്കാലമായി താമസിക്കുന്ന വനിതയുടെ പരാതിപ്രകാരം, അക്രമി ശരീരത്തിൽ പിടിച്ചുവലിക്കുകയും വസ്ത്രങ്ങൾ വലിച്ചുകീറാൻ ശ്രമിക്കുകയും ചെയ്തു. ഇതിനിടെ രക്ഷപ്പെടാൻ ശ്രമിച്ച അവർ സമീപത്തുണ്ടായിരുന്ന വിനോദസഞ്ചാരികളുടെ സഹായം തേടി. എട്ടുപേർ ഇടപെട്ടെങ്കിലും അക്രമിയെ തടയാനായില്ലെന്നാണ് പരാതിയിൽ പറയുന്നത്. തുടർന്ന് മറ്റൊരു സംഘത്തിലെ ആറുപേർ കൂടി ഇടപെട്ടതോടെയാണ് അക്രമിയെ തടഞ്ഞുനിർത്തി തനിക്ക് സുരക്ഷിതത്വം ഉറപ്പാക്കാനായതെന്നും പരാതിക്കാരി വ്യക്തമാക്കുന്നു. മറ്റുള്ളവർ തടയാൻ ശ്രമിച്ചിട്ടും അക്രമി ആക്രമണശ്രമം തുടർന്നതായും പരാതിയിൽ ആരോപിക്കുന്നു. ബ്രിട്ടീഷ് പൗരത്വമുള്ള വനിത നൽകിയ പരാതിയിൽ…
കടയ്ക്കാവൂർ: വക്കം ഇറങ്ങുകടവ് കായലിൽ നിന്നും മൃതദേഹം കണ്ടെത്തി. ചിറയിൻകീഴ് കൂന്തളൂർ വൈദ്യന്റെമുക്ക് വയൽതിട്ട വീട്ടിൽ കുമാർ (49) ന്റെ മൃതദേഹമാണ് രണ്ടു ദിവസം പഴക്കമുള്ള നിലയിൽ കണ്ടെത്തിയത്. തിങ്കളാഴ്ച രാവിലെ 9 മണിയോടെ നാട്ടുകാരാണ് മൃതദേഹം കണ്ടത്. തുടർന്ന് കടയ്ക്കാവർ പോലീസും ആറ്റിങ്ങൽ ഫയർഫോഴ്സും ചേർന്നാണ് കായലിൽ നിന്നും മൃതദേഹം കരയ്ക്കെത്തിച്ചത്. മത്സ്യ ഫാമിലെ തൊഴിലാളിയായിരുന്നു കുമാർ. ഏറെനാളായി വക്കം ഇറങ്ങുകടവിലാണ് താമസിച്ചിരുന്നത്. കടക്കാവൂർ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. പാരിപ്പള്ളി മെഡിക്കൽ കോളേജിൽ പോസ്റ്റ്മോർട്ടം നടപടികൾക്ക് ശേഷം ശേഷം മൃതദേഹം ബന്ധുക്കൾക്ക് കൈമാറി.
വർക്കല: പുത്തൻചന്തയിൽ പൂക്കട നടത്തിവരുന്ന വയോധികയ്ക്ക് നേരെ തെരുവുനായയുടെ ആക്രമണം. വർക്കല രഘുനാഥപുരം ഷിജു ഭവനിൽ ശാന്ത (75)യ്ക്കാണ് കടിയേറ്റത്. പൂക്കടയ്ക്കുള്ളിൽ കയറിയ തെരുവുനായയാണ് വയോധികയെ ആക്രമിച്ചത്. ആക്രമണത്തിൽ ശാന്തയുടെ ഇടതുകാലിൽ മുട്ടിന് താഴെയുള്ള ഭാഗത്ത് ഗുരുതരമായി പരിക്കേറ്റു. കടിയേറ്റ ഭാഗത്തെ ഞരമ്പുകൾ അറ്റുപോയി അമിതമായി രക്തസ്രാവമുണ്ട്.കാലിലെ മാംസവും കടിച്ചു പറിച്ചു. തുടർന്ന് വയോധികയെ വർക്കലയിലെ സ്വകാര്യ ആശുപത്രിയിൽ പ്രവേശിപ്പിച്ചു. വിദഗ്ധ ചികിത്സയ്ക്കായി തിരുവനന്തപുരം മെഡിക്കൽ കോളേജ് ആശുപത്രിയിലേക്ക് റഫർ ചെയ്തതായി ആശുപത്രി അധികൃതർ അറിയിച്ചു.
അഞ്ചുതെങ്ങ്: കായിക്കരയിൽ കടയുടമയെയും സുഹൃത്തിനെയും കടയിൽ അതിക്രമിച്ചു കയറി മർദിച്ച രണ്ടുപേരെ പോലീസ് അറസ്റ്റ് ചെയ്തു. കായിക്കര സ്വദേശികളായ സജി, ജിഷ്ണു എന്നിവരെയാണ് അഞ്ചുതെങ്ങ് പോലീസ് അറസ്റ്റ് ചെയ്തത്.കായിക്കരയിൽ വ്യാപാരം നടത്തുന്ന ചന്ദ്രനും സുഹൃത്ത് കുമാറിനുമാണ് മർദനമേറ്റത്. കഴിഞ്ഞ 16ന് രാത്രി ഒമ്പതുമണിയോടെയായിരുന്നു സംഭവം. കായിക്കര മൂലൈതോട്ടത്തിൽ ചന്ദ്രന്റെ ഉടമസ്ഥതയിലുള്ള സ്റ്റേഷനറി കടയിൽ പ്രതികൾ അതിക്രമിച്ചുകയറി ചന്ദ്രനെ അസദ്യം വിളിക്കുകയും തുടർന്ന് മർദിക്കുകയായിരുന്നുവെന്ന് പോലീസ് പറഞ്ഞു. മർദ്ദനത്തിൽ അവശനായി നിലത്തുവീണ ചന്ദ്രനെ സഹായിക്കാനെത്തിയ സുഹൃത്ത് കുമാറിനെയും പ്രതികൾ മർദിച്ചതായാണ് പരാതി. തുടർന്ന് പ്രത്രികൾ നിലത്തുവീണ ചന്ദ്രനെ വലിച്ചിഴച്ച് കടയ്ക്ക് പുറത്തുകൊണ്ടുവന്നും മർദനം തുടർന്നതായി പോലീസ് പറയുന്നു. അളവുതൂക്കം നിശ്ചയിക്കുന്ന ത്രാസിന്റെ ഇരുമ്പ് തൂക്കുകട്ട ഉപയോഗിച്ചായിരുന്നു ആക്രമണം. മർദനത്തിൽ ചന്ദ്രനും, കുമാറിനും മുഖത്തും, കണ്ണിനും ഗുരുതരമായി പരിക്കേറ്റു. ഇവർ അശുപത്രിയിൽ ചികിൽസ തേടി. അനധികൃത മദ്യവിൽപ്പന സംബന്ധിച്ച് പരാതി നൽകാൻ പറഞ്ഞതാണ് ആക്രമണത്തിന് പിന്നിലെന്ന് പോലീസ്. പ്രതികൾ അനധികൃതമായി ചില്ലറ മദ്യവിൽപ്പന നടത്തുന്നതായി…
ഇടവ: നിയന്ത്രണം നഷ്ടപ്പെട്ട സ്വകാര്യ ബസ് പള്ളിയുടെ മതിലിടിച്ച് തകർത്തശേഷം റോഡിന് കുറുകെ നിന്നു. അപകടത്തിൽ നിരവധി യാത്രക്കാർക്ക് പരിക്കേറ്റു. വർക്കലയിൽനിന്ന് പരവൂർ ഭാഗത്തേക്ക് പോകുകയായിരുന്ന സ്വകാര്യ ബസാണ് അപകടത്തിൽപ്പെട്ടത്. തീരദേശ പാതയിൽ വെറ്റക്കട പള്ളിക്ക് മുൻവശത്തുള്ള വളവിലാണ് അപകടം നടന്നത്. നിയന്ത്രണം നഷ്ടപ്പെട്ട ബസ് സമീപത്തെ പള്ളിയുടെ മതിലിൽ ഇടിച്ച് തകർത്തശേഷം റോഡിന് കുറുകെ നിൽക്കുകയായിരുന്നു. അപകടത്തെത്തുടർന്ന് ബസിലുണ്ടായിരുന്ന നിരവധി യാത്രക്കാർക്ക് പരിക്കേറ്റു. ഇടവ സ്വദേശികളായ റിഫാൻ (21), ഹാജിറ (22) എന്നിവർ വർക്കല ഗവൺമെന്റ് താലൂക്ക് ആശുപത്രിയിൽ ചികിത്സയിലാണ്. പുല്ലാന്നിക്കോട് സ്വദേശി ശ്യാംരാജ് (36), ഇടവ സ്വദേശി നൂറാ നാസർ (29) എന്നിവർ വർക്കലയിലെ സ്വകാര്യ ആശുപത്രിയിൽ ചികിത്സയിലാണ്.അപകടത്തിൽ പരിക്കേറ്റ മറ്റു ചിലർ വിവിധ സ്വകാര്യ ആശുപത്രികളിൽ സ്വയം ചികിത്സ തേടിയതായാണ് വിവരം. ബസ് ഡ്രൈവർ മദ്യപിച്ചിരുന്നതായി നാട്ടുകാർ ആരോപിച്ചതിനെത്തുടർന്ന് ഡ്രൈവറെ അയിരൂർ പോലീസ് കസ്റ്റഡിയിലെടുത്തു. തുടർന്ന് ഡ്രൈവറെ വൈദ്യപരിശോധനയ്ക്ക് വിധേയനാക്കുമെന്ന് അയിരൂർ പോലീസ് അറിയിച്ചു. തീരദേശ പാതയിൽ…
കടയ്ക്കാവൂർ: മീരാൻകടവ്–മാടൻനട റോഡരികിൽ ഒരു മാസത്തിലേറെയായി ഉടമസ്ഥനില്ലാതെ സ്കൂട്ടർ ഉപേക്ഷിച്ച നിലയിൽ. ടിവിഎസ് വെഗോ സ്കൂട്ടറാണ് KL 16 N 4139 എന്ന രജിസ്ട്രേഷൻ നമ്പറിൽ പ്രദേശത്തെ പൂക്കടയ്ക്ക് സമീപം കണ്ടെത്തിയത്. രണ്ട് യുവാക്കൾ സ്കൂട്ടർ ഇവിടെ കൊണ്ടുവന്ന് വെച്ചതായാണ് പ്രദേശത്തെ വ്യാപാരികൾ പറയുന്നത്. ഇവരെ ഇതിനുമുമ്പ് പ്രദേശത്ത് കണ്ടിട്ടില്ലെന്നും വ്യാപാരികൾ വ്യക്തമാക്കി. ദിവസങ്ങളോളം കഴിഞ്ഞിട്ടും സ്കൂട്ടർ ഇവിടെനിന്ന് മാറ്റാത്തത് പ്രദേശവാസികളിലും വ്യാപാരികളിലും സംശയമുണ്ടാക്കിയിട്ടുണ്ട്. വാഹനം ഉപേക്ഷിച്ചതിന് പിന്നിലെ കാരണം വ്യക്തമല്ല. സംഭവത്തിൽ ബന്ധപ്പെട്ട അധികൃതർ പരിശോധന നടത്തി വാഹനത്തിന്റെ ഉടമസ്ഥനെ കണ്ടെത്തണമെന്നാണ് നാട്ടുകാരുടെ ആവശ്യം.
വർക്കല: ഇടവയിൽ നിയന്ത്രണം നഷ്ടപ്പെട്ട് സ്വകാര്യ ബസ് അപകടത്തിൽപ്പെട്ട സംഭവത്തിൽ ഡ്രൈവറെ അയിരൂർ പോലീസ് അറസ്റ്റ് ചെയ്തു. പാരിപ്പള്ളി സ്വദേശി രാജേഷാണ് അറസ്റ്റിലായത്.മദ്യലഹരിയിലായിരുന്നു ഡ്രൈവറെന്ന് വൈദ്യപരിശോധനയിൽ വ്യക്തമായതിനെ തുടർന്നാണ് നടപടി. സംഭവത്തെ തുടർന്ന് നാട്ടുകാർ ഉന്നയിച്ച ആരോപണങ്ങളുടെ അടിസ്ഥാനത്തിൽ ഡ്രൈവറെ വർക്കല താലൂക്ക് ആശുപത്രിയിൽ വൈദ്യപരിശോധനയ്ക്ക് വിധേയനാക്കിയിരുന്നു. പരിശോധനയിൽ ഡ്രൈവർ മദ്യലഹരിയിലായിരുന്നതായി കണ്ടെത്തി. സംഭവത്തിൽ ഭാരതീയ ന്യായ സംഹിത (BNS) വകുപ്പ് 110, മോട്ടോർ വാഹന നിയമത്തിലെ 184, 185 വകുപ്പുകൾ എന്നിവ പ്രകാരമാണ് അയിരൂർ പോലീസ് കേസെടുത്തത്. നിയമനടപടികൾ പൂർത്തിയാക്കിയ ശേഷം പ്രതിയെ കോടതിയിൽ ഹാജരാക്കുമെന്ന് അയിരൂർ പോലീസ് അറിയിച്ചു.
വർക്കല: ജീവനൊടുക്കാൻ ശ്രമിച്ചതിനെ തുടർന്ന് ചികിത്സയിലായിരുന്ന ശിവഗിരി പന്തുകളം സ്വദേശിനി ബീന (47) മരിച്ചു. തിരുവനന്തപുരം മെഡിക്കൽ കോളേജ് ആശുപത്രിയിൽ തിങ്കളാഴ്ച ഉച്ചയ്ക്ക് 12 മണിയോടെയായിരുന്നു അന്ത്യം. സെപ്റ്റംബർ 10ന് വീട്ടിൽ അവശനിലയിൽ കണ്ടെത്തിയ ബീനയെ ആദ്യം വർക്കലയിലെ സ്വകാര്യ ആശുപത്രിയിലും പിന്നീട് തിരുവനന്തപുരം മെഡിക്കൽ കോളേജിലും പ്രവേശിപ്പിക്കുകയായിരുന്നു. വർക്കല നഗരസഭ 13-ാം വാർഡിലെ തൊഴിലുറപ്പ് തൊഴിലാളികളുടെ മേറ്റായി പ്രവർത്തിച്ചുവരികയായിരുന്നു. ഭർത്താവ് ബിജു, മകൻ ഗൗതം കൃഷ്ണ. വർക്കല പൊലീസ് കേസെടുത്ത് തുടർനടപടികൾ സ്വീകരിച്ചു.
വർക്കല: വർക്കല ഉപജില്ലാ എൽ.പി. വിഭാഗം ഗണിതശാസ്ത്രമേളയിൽ മികച്ച നേട്ടവുമായി വക്കം ഗവൺമെന്റ് ന്യൂ എൽ.പി.എസ്. ശ്രദ്ധേയമായി. എൽ.പി. വിഭാഗത്തിൽ ഓവറോൾ മൂന്നാം സ്ഥാനം നേടിയ സ്കൂൾ, പൊതുവിദ്യാലയങ്ങളിൽ ഒന്നാം സ്ഥാനവും കരസ്ഥമാക്കി. പരിമിതമായ സാഹചര്യങ്ങൾക്കിടയിലും സ്കൂൾ നേടിയ ഈ വിജയം അധ്യാപകർക്കും വിദ്യാർഥികൾക്കും രക്ഷിതാക്കൾക്കും ഒരുപോലെ അഭിമാനമായി. അധ്യാപകർ, രക്ഷിതാക്കൾ, സ്കൂൾ മാനേജ്മെന്റ് കമ്മിറ്റി (എസ്.എം.സി.) അംഗങ്ങൾ എന്നിവരുടെ കൂട്ടായ പരിശ്രമവും പ്രോത്സാഹനവും പിന്തുണയുമാണ് നേട്ടത്തിന് പിന്നിലെന്ന് സ്കൂൾ അധികൃതർ വ്യക്തമാക്കി.
വർക്കല: പോക്സോ കേസിൽ ഒളിവിലായിരുന്ന പ്രതിയെ മോഷ്ടിച്ച ഇരുചക്രവാഹനങ്ങളും കഞ്ചാവുമായി ഡാൻസാഫ് സംഘം പിടികൂടി. ചെമ്മരുതി ഞെക്കാട് വലിയവിള ബൈജു നിവാസിൽ പ്രിയേഷ് (25) ആണ് അറസ്റ്റിലായത്. വർക്കല അയിരൂർ പോലീസ് രജിസ്റ്റർ ചെയ്ത പോക്സോ കേസിലെ പ്രതിയാണ് ഇയാൾ. പ്രായപൂർത്തിയാകാത്ത പെൺകുട്ടി ഗർഭിണിയായതിനെത്തുടർന്ന് തിരുവനന്തപുരം എസ്.എ.ടി. ആശുപത്രിയിൽ ചികിത്സ തേടിയിരുന്നു. ആശുപത്രിയിൽനിന്ന് ലഭിച്ച വിവരത്തിന്റെ അടിസ്ഥാനത്തിലാണ് അയിരൂർ പോലീസ് പോക്സോ കേസ് രജിസ്റ്റർ ചെയ്തത്. കേസിനുപിന്നാലെ ഒളിവിൽ പോയ പ്രതിക്കായി പോലീസ് വ്യാപക തിരച്ചിൽ നടത്തിവരികയായിരുന്നു.കല്ലമ്പലം പോലീസിന്റെ റൗഡി ലിസ്റ്റിൽ ഉൾപ്പെട്ടയാളാണ് പിടിയിലായ പ്രിയേഷ്. ഇയാളെ ചോദ്യം ചെയ്തതിൽനിന്ന് കണ്ടെത്തിയ രണ്ട് ഇരുചക്രവാഹനങ്ങൾ തിരുവനന്തപുരം മെഡിക്കൽ കോളേജ് ആശുപത്രി പരിസരത്തെ പാർക്കിങ് ഏരിയയിൽനിന്ന് മോഷ്ടിച്ചതാണെന്ന് വ്യക്തമായതായി പോലീസ് അറിയിച്ചു. പ്രതിയിൽനിന്ന് കഞ്ചാവും പിടിച്ചെടുത്തിട്ടുണ്ട്.ഡാൻസാഫ് സംഘം പിടികൂടിയ പ്രതിയെ തുടർനടപടികൾക്കായി അയിരൂർ പോലീസിന് കൈമാറി. നിയമനടപടികൾ പൂർത്തിയാക്കി പ്രതിയെ കോടതിയിൽ ഹാജരാക്കുമെന്ന് അയിരൂർ പോലീസ് അറിയിച്ചു.
