Author: News Admin
വര്‍ക്കല: ഇടവയില്‍ തെരുവുനായ ആക്രമണത്തില്‍നിന്ന് അഞ്ചുവയസ്സുകാരന് രക്ഷപെട്ടത് തലനാരിഴയ്ക്ക്. ഇടവ ഡീസന്റുമക്കില്‍ ദാറുഅറഫയില്‍ സുമയ്യയുടെ മകനാണ് കഴിഞ്ഞ ദിവസം തെരുവുനായ ആക്രമണത്തില്‍ നിന്നും നിലവിളിച്ച് അതിവേഗത്തില്‍ ഓടി രക്ഷപ്പെട്ടത്. സൈക്കിളിംഗ് നടത്തിക്കൊണ്ടിരുന്ന അഞ്ചുവയസ്സുകാരന് നേരെ തെരുവുനായ്ക്കള്‍ ഓടിയെടുത്തതോടെ കുട്ടി അതിവേഗത്തില്‍ ഓടി അടുത്തുള്ള വീട്ടില്‍ക്കയറി രക്ഷപ്പെടുകയായിരുന്നു. ഡീസന്റ്മുക്കിലുള്ള കുറ്റിക്കാടുകളില്‍ ഇറച്ചി മാലിന്യങ്ങള്‍ ഉപേക്ഷിക്കുന്നതാവാം ആ ഭാഗത്ത് തെരുവ് നായ്ക്കളുടെ ശല്യം രൂക്ഷമാകുന്നതെന്ന് പ്രദേശവാസികള്‍ പറയുന്നു.ഇരുപതിലധികം തെരുവു നായ്ക്കള്‍ റോഡരുകിലും സമീപമുള്ള കുറ്റിക്കാടുകളിലും എപ്പോഴും കാണുമെന്നും വാഹനങ്ങളില്‍ പോകുന്നവരെയും കാല്‍നടയാത്രക്കാരെയും ആക്രമണ സ്വഭാവമുള്ള ഈ തെരുവ് നായ്ക്കള്‍ ആക്രമിക്കാറുണ്ടെന്നും നിത്യേന അപകടം സംഭവിക്കാറുണ്ടെന്നും പ്രദേശവാസികള്‍ വ്യക്തമാക്കി. ഇടവ ഗ്രാമപഞ്ചായത്തില്‍ പരാതി നല്‍കിയിട്ടും ഒരു ഫലവും ഉണ്ടായില്ല എന്നും പ്രദേശവാസികള്‍ പരാതിപ്പെടുന്നു. ദൃശ്യങ്ങള്‍ പകര്‍ത്തുന്ന സമയത്തും തെരുവ് നായ്ക്കള്‍ കുരച്ചുകൊണ്ട് പാഞ്ഞടുക്കുകയായിരുന്നു.
വര്‍ക്കല: വര്‍ക്കല എക്‌സൈസ് ഓഫീസില്‍ കയ്യാങ്കളി. എക്‌സൈസ് ഇന്‍സ്‌പെക്ടറെ മര്‍ദ്ദിച്ച പ്രിവന്റീവ് ഓഫീസര്‍ ജസീനിനെ സസ്‌പെന്‍ഡ് ചെയ്തു. കഴിഞ്ഞ ഞായറാഴ്ച നാലര മണിയോടെയായിരുന്നു സംഭവം. ഓഫീസില്‍ മദ്യപിച്ചെത്തിയ ജസീന്‍ എക്‌സൈസ് ഇന്‍സ്‌പെക്ടറായ സൂര്യനാരായണനെ അസഭ്യം പറയുകയും മര്‍ദ്ദിക്കുകയും ചെയ്തു. നേരത്തെ ഇയാള്‍ക്കെതിരെ കേസ് എടുത്തിരുന്നു. കോടതി പ്രയെ കര്‍ശന ഉപാധികളോടെ ജാമ്യത്തില്‍ വിട്ടു. തുടര്‍ന്നാണ്, വകുപ്പുതല നടപടി സ്വീകരിക്കുകയായിരുന്നു. പ്രതിയായ ജസീന്‍ എല്ലാ ദിവസവും വര്‍ക്കല എക്‌സൈസ് റെയിഞ്ച് ഓഫീസിലെത്തി രാവിലെ ഒപ്പ് വച്ചതിനുശേഷം തിരികെ പോകാറാണ് പതിവെന്നും, ഒരാഴ്ച മുമ്പ് വര്‍ക്കല റെയിഞ്ച് എക്‌സൈസ് എസ്.ഐ ആയി ചുമതലയേറ്റ സൂര്യനാരായണന്‍ ഇത് ചോദ്യം ചെയ്തതാണ് പ്രതിയെ പ്രകോപിപ്പിച്ചതെന്നുമാണ് ലഭിക്കുന്ന വിവരം. ഇത് രണ്ടാം തവണയാണ് ഇയാള്‍ സസ്‌പെന്‍ഷന്‍ നടപടിക്ക് വിധേയനാകുന്നത്. നാല് വര്‍ഷം മുമ്പ് തിരുവനന്തപുരം വട്ടപ്പാറയില്‍ റോഡില്‍ പാര്‍ക്ക് ചെയ്തിരുന്ന ബൈക്ക് അടിച്ചു നശിപ്പിച്ച കേസിലും ഇയാള്‍ പ്രതിയായിരുന്നു. ജസീന്‍ നടത്തിയ ആക്രമണത്തില്‍ നെഞ്ചിലും, മുതുകിലും പരിക്കേറ്റ സൂര്യനാരായണന്‍…
കടയ്ക്കാവൂര്‍: അഞ്ചുതെങ്ങില്‍ കൊലക്കേസ് പ്രതി കാപ്പ നിയമപ്രകാരം കരുതല്‍ തടങ്കലില്‍. നെടുങ്ങണ്ട അരിവാളം കാക്കക്കുഴി റംസീന മന്‍സിലില്‍ ഷുക്കൂറിന്റെ മകന്‍ റിയാസ്(28)ആണ് അറസ്റ്റിലായത്. അഞ്ചുതെങ്ങ് പോലീസ് സ്‌റ്റേഷന്‍ ഇന്‍സ്‌പെക്ടര്‍ ബിനീഷ് ലാല്‍ തിരുവനന്തപുരം റൂറല്‍ എസ്.പിക്ക് സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തിലാണ് ഇയാള്‍ക്കുനേരെ കാപ്പ ചുമത്തിയത്. അഞ്ചുതെങ്ങ് പോലീസ് സബ് ഇന്‍സ്‌പെക്ടര്‍ മഹീനിന്റെ നേതൃത്വത്തിലുള്ള പോലീസ് സംഘമാണ് പ്രതിയെ അറസ്റ്റ് ചെയ്തത്.
ആറ്റിങ്ങൽ: ലോക്സഭാ മണ്ഡലത്തിൽ സിപിഐഎമ്മിനെതിരെ കള്ളവോട്ട് ആരോപണവുമായി ആറ്റിങ്ങൽ എംപി അടൂർ പ്രകാശ് രംഗത്തെത്തി. എ. സമ്പത്ത് തുടർച്ചയായി വിജയിച്ചത് കള്ളവോട്ടുകളുടെ പിന്തുണയോടെയാണെന്ന് അദ്ദേഹം ആരോപിച്ചു. “കഴിഞ്ഞ ലോക്സഭാ തിരഞ്ഞെടുപ്പിൽ ബിജെപിക്ക് വോട്ട് ശതമാനം വർധിച്ചതിന്റെ സാഹചര്യങ്ങളും പരിശോധിക്കും. ആവശ്യമെങ്കിൽ വീണ്ടും കോടതിയെ സമീപിക്കും. മണ്ഡലത്തിൽ ഒന്നര ലക്ഷത്തിലധികം ഇരട്ട വോട്ടുകളുണ്ട്,” അദ്ദേഹം മാധ്യമങ്ങളോട് പറഞ്ഞു. 2019, 2024 ലോക്സഭാ തിരഞ്ഞെടുപ്പുകളിലായാണ് ഇരട്ട വോട്ടുകൾ കണ്ടെത്തിയതെന്നും, ഈ വിവരം നേരത്തെ തന്നെ തിരഞ്ഞെടുപ്പ് കമ്മീഷനെ അറിയിച്ചതായും എംപി വ്യക്തമാക്കി.
ആറ്റിങ്ങൽ: കേരള കർഷക തൊഴിലാളി യൂണിയൻ (കെ.എസ്.കെ.റ്റി.യു) ആറ്റിങ്ങൽ ഏരിയ കമ്മിറ്റിയുടെ നേതൃത്വത്തിൽ വി.എസ്. അച്യുതാനന്ദൻ അനുസ്മരണം സംഘടിപ്പിച്ചു. അനുസ്മരണ പ്രഭാഷണം സി.പി.ഐ.എം തിരുവനന്തപുരം ജില്ല സെക്രട്ടറിയേറ്റ് അംഗം ബി.പി. മുരളി നിർവഹിച്ചു. യോഗത്തിൽ കെ.എസ്.കെ.റ്റി.യു ആറ്റിങ്ങൽ ഏരിയ പ്രസിഡന്റ് സി.എസ്. അജയകുമാർ അധ്യക്ഷത വഹിച്ചു. സി.പി.ഐ.എം ജില്ല കമ്മിറ്റി അംഗം ആർ. സുഭാഷ്, കെ.എസ്.കെ.റ്റി.യു കേന്ദ്ര വർക്കിംഗ് കമ്മിറ്റി അംഗം ഒ.എസ്. അംബിക എം.എം.എ, സി.പി.ഐ.എം ആറ്റിങ്ങൽ ഏരിയ സെക്രട്ടറി എം. പ്രദീപ്, കെ.എസ്.കെ.റ്റി.യു ആറ്റിങ്ങൽ ഏരിയ സെക്രട്ടറി ആർ. രാജു, ഏരിയ കമ്മിറ്റി അംഗങ്ങളായ ജി. വേണുഗോപാലൻ നായർ, പി. മണികണ്ഠൻ, ആർ.എസ്. അനൂപ്, എസ്. ചന്ദ്രൻ, കൂന്തള്ളൂർ ലോക്കൽ കമ്മിറ്റി സെക്രട്ടറി ഡി. ഹരീഷ്, കിഴുവിലം ലോക്കൽ കമ്മിറ്റി സെക്രട്ടറി ആർ.കെ. ബാബു, വി.എസ്. വിജു കുമാർ, എസ്. സതീഷ് കുമാർ എന്നിവർ പങ്കെടുത്തു.
പെരിങ്ങമ്മല പഞ്ചായത്തിലെ നവീകരിച്ച പബ്ലിക് മാർക്കറ്റും പഞ്ചായത്ത് ഓഫീസ് അനുബന്ധന കെട്ടിട സമുച്ചയവും തദ്ദേശ സ്വയംഭരണ വകുപ്പ് മന്ത്രി എം.ബി.രാജേഷ് ഉദ്ഘാടനം ചെയ്തു. ഇതിലൂടെ പെരിങ്ങമ്മല പഞ്ചായത്തിലെ പ്രധാനപ്പെട്ട രണ്ട് വികസന പദ്ധതികൾ യാഥാർഥ്യമാവുകയാണെന്ന് അദ്ദേഹം പറഞ്ഞു. പബ്ലിക്ക് മാർക്കറ്റിൽ മാതൃകാപരവും മികച്ച രീതിയിലും മാലിന്യ സംസ്കരണത്തിനുള്ള വഴികൾ ഏർപ്പെടുത്തിയിട്ടുണ്ട്. രാജ്യത്ത് എല്ലാ തദ്ദേശ സേവനങ്ങളും പൂർണമായും വിരൽത്തുമ്പിൽ എത്തിച്ച ആദ്യത്തെ സംസ്ഥാനമാണ് കേരളമെന്നും, കെ സ്മാർട്ട് ആപ്പ് ജനങ്ങൾ ഫലപ്രദമായി വിനിയോഗിക്കണമെന്നും അദ്ദേഹം പറഞ്ഞു. പെരിങ്ങമ്മല ഗ്രാമപഞ്ചായത്തിൽ പുതിയതായി പണികഴിപ്പിച്ച പബ്ലിക് ലൈബ്രറി, ഐ. സി. ഡി. എസ് ഓഫീസ്, സാക്ഷരതാ മിഷൻ, തുടർവിദ്യാഭ്യാസ കേന്ദ്രം, അതിഥി മന്ദിരം, വ്യവസായ സംരംഭക സഹായ കേന്ദ്രം എന്നിവ ഉൾപ്പെട്ടതാണ് പുതിയ ഓഫീസ് സമുച്ചയം. 67 ലക്ഷം ചെലവഴിച്ചാണ് ഓഫീസ് സമുച്ചയം നിർമിച്ചത്. 1 കോടി 47 ലക്ഷം രൂപ ചെലവഴിച്ച് നവീകരിച്ച മാർക്കറ്റിൽ അനവധി കടമുറികളുള്ള ഷോപ്പിംഗ് കോംപ്ലക്സ്, ആധുനിക നിലവാരത്തിലുള്ള…
ആറ്റിങ്ങൽ : ഒരുവർഷത്തെ എൻസിവിടിയുടെ കംപ്യൂട്ടർ ഓപ്പറേറ്റർ ആൻഡ് പ്രോഗ്രാമിങ് അസിസ്റ്റന്റ് കോഴ്‌സിലേക്ക് ആറ്റിങ്ങൽ യുടെക് ഐടിഐയിൽ തത്സമയപ്രവേശനം നടത്തുന്നു. പ്ലസ്ടു, ബിരുദം കഴിഞ്ഞവർക്ക് മുൻഗണന ലഭിക്കും. ന്യൂനപക്ഷ വിഭാഗത്തിൽപ്പെടുന്നവർക്ക് മൈനോറിറ്റി സ്കോളർഷിപ്പ്, പട്ടികജാതി, പട്ടികവർഗ വിഭാഗത്തിലെ കുട്ടികൾക്ക് സീറ്റ് സംവരണം, ബസ്, തീവണ്ടി കൺസെഷൻ സൗകര്യം എന്നിവയുണ്ടാകും.വിവരങ്ങൾക്കും പ്രവേശനത്തിനും യുടെക് ഐടിഐ, പ്രൈവറ്റ് ബസ് സ്റ്റാൻഡിനു സമീപം, ആറ്റിങ്ങൽ. വിവരങ്ങൾക്ക്‌: 9072991069.
വിതുര : കർഷകരെ ദുരിതത്തിലാക്കി മലയോരമേഖലയിൽ കാട്ടുപന്നിശല്യം രൂക്ഷം. വനമേഖലയുമായി അതിർത്തി പങ്കിടുന്ന വിതുര, തൊളിക്കോട്, പെരിങ്ങമ്മല, നന്ദിയോട് പഞ്ചായത്തുകളിലാണ് പന്നിശല്യം കൂടുതൽ. മരച്ചീനി, വാഴ, പച്ചക്കറികൾ തുടങ്ങിയ വിളകളെല്ലാം പന്നിക്കൂട്ടം കുത്തിമറിക്കുന്നതായി അവർ പറയുന്നു. വിതുര പഞ്ചായത്തിലെ ആനപ്പാറ, കല്ലാർ, മണലി, തൊളിക്കോട്ടെ അപ്പച്ചിപ്പാറ, കംബ്ലാറ, ചെറുവക്കോണം, നാഗര, വട്ടപ്പൻകാട്, പരപ്പാറ, പുളിച്ചാമല, നന്ദിയോട് പഞ്ചായത്തിലെ കാലങ്കാവ്, നവോദയ, പൊട്ടൻചിറ, കടുവാച്ചിറ തുടങ്ങിയ സ്ഥലങ്ങളിലുള്ളവരാണ് കാട്ടുപന്നിശല്യത്താൽ പൊറുതിമുട്ടുന്നത്. സ്വാഭാവിക വനമേഖല പ്ലാന്റേഷനായതോടെയാണ് പന്നിക്കൂട്ടം നാട്ടിലേക്കിറങ്ങിത്തുടങ്ങിയത്‌. വനത്തോടുചേർന്ന റോഡുവക്കുകളിലെ മാലിന്യം തള്ളലാണ് മറ്റൊരു പ്രശ്നം. മാലിന്യങ്ങൾ തേടിവരുന്ന പന്നിക്കൂട്ടം റോഡുമുറിച്ചു കടക്കുമ്പോഴുണ്ടാകുന്ന ഇരുചക്രവാഹനാപകടങ്ങളും പതിവാണ്. മാലിന്യനിക്ഷേപം തടയുന്നതിന് വനംവകുപ്പ് ഫലപ്രദമായ നടപടി സ്വീകരിക്കുന്നില്ലെന്നും പരാതിയുണ്ട്
കാട്ടാക്കട : വിദേശരാജ്യങ്ങളിലെ വിവിധ സ്കൂളുകളിൽ പഠിക്കുന്ന 25 കുട്ടികൾ. പാടവും കാടും കടലും കണ്ട് ആ കുട്ടിക്കൂട്ടം മടങ്ങിയത് വീണ്ടുമെത്തുമെന്ന പ്രതിജ്ഞയോടെ. കാട്ടാക്കട നിയോജകമണ്ഡലവും മലയാളം മിഷനും സംയുക്തമായി സംഘടിപ്പിച്ച സാംസ്കാരിക വിനിമയ പരിപാടിയായ ‘വേരുകൾ ചിറകുകൾ’ എന്ന ത്രിദിന സഹവാസ ക്യാമ്പാണ് വേറിട്ട അനുഭവമായത്. വിദേശത്തുനിന്നെത്തിയ 25 മലയാളം മിഷൻ വിദ്യാർഥികൾ കാട്ടാക്കടയിലെ 25 കുട്ടികളുടെ വീടുകളിൽ താമസിച്ച് സഹ്യനിൽനിന്നു സാഗരംവരെ സഞ്ചരിക്കുന്ന നാടറിവ് യാത്രയാണ് വേരുകൾ ചിറകുകൾ എന്ന പരിപാടി. സാംസ്കാരികവകുപ്പ് ഡയറക്ടർ ദിവ്യ എസ്. അയ്യരാണ് വിളപ്പിൽശാലയിൽ പരിപാടി ഉദ്ഘാടനം ചെയ്തത്. മന്ത്രി വി. ശിവൻകുട്ടിയും ആശംസനേരാനെത്തി. കോട്ടൂർ ആനപരിപാലനകേന്ദ്രം, നെയ്യാർഡാം, നാഞ്ചല്ലൂർ പാടശേഖരം, അരുവിപ്പുറം, പൂവാർ, പൊഴിക്കര, ആഴിമല ശിവക്ഷേത്രം, വിഴിഞ്ഞം തുറമുഖം എന്നിവിടങ്ങൾ സന്ദർശിച്ച കുട്ടിക്കൂട്ടം കോവളം ആർട്ട്‌ ആൻഡ് ക്രാഫ്റ്റ് വില്ലേജിലെത്തി മൂന്നുദിവസത്തെ അനുഭവങ്ങൾ പങ്കുവയ്ക്കുകയും കലാപരിപാടികൾ അവതരിപ്പിക്കുകയും ചെയ്തു. തുടർന്ന് അടുത്ത ക്യാമ്പിനായുള്ള നിർദേശങ്ങളും പങ്കുവെച്ചു. വീണ്ടും ഇത്തരം അവസരം ഒരുക്കണമെന്ന…
ചിറയിൻകീഴ് : മരണത്തിന്റെ നിറമാണ് മുതലപ്പൊഴിയിലെ തിരകൾക്ക്. കഴിഞ്ഞ രണ്ടാഴ്ചയ്ക്കിടയിൽ ഇത് എട്ടാമത്തെ അപകടമാണ് തിങ്കളാഴ്ച മുതലപ്പൊഴിയിലുണ്ടായത്. ഫിഷറീസ് വകുപ്പിന്റെ കണക്കനുസരിച്ച് ഇതുവരെ 66 പേരാണ് മുതലപ്പൊഴിയിൽ വള്ളം അപകടത്തിൽപ്പെട്ട് മരിച്ചത്. ഒടുവിലത്തെ പേരുകളാണ് അഞ്ചുതെങ്ങ് സ്വദേശി മൈക്കിൾ, ചിറയിൻകീഴ് കടകം സ്വദേശി ജോസഫ് എന്നിവരുടേത്. എന്നാൽ, ദുരന്തങ്ങൾക്ക് ശമനമുണ്ടാകുമെന്ന് പ്രതീക്ഷിക്കാനല്ലാതെ, മറ്റൊന്നിനും കഴിയാത്ത ദുർഗതിയിലാണ് ഇവിടത്തെ മത്സ്യത്തൊഴിലാളികൾ. പൊഴിമുഖത്തെ മണൽ പൂർണമായും നീക്കാനാകാത്തതാണ് തിരയടി ശക്തമാകാൻ കാരണം. അപകടത്തിൽപ്പെടുന്നവരെല്ലാം നീന്തിയും മറ്റ് വള്ളങ്ങളിലുമായാണ് രക്ഷപ്പെടുന്നത്. വള്ളം അഴിമുഖത്തെ മണലിൽ ഉറച്ച സംഭവവും ഉണ്ടായിട്ടുണ്ട്. പൊഴിമുഖത്തെ മണൽ പൂർണമായും നീക്കാനാകാത്തതാണ് തിരയടി ശക്തമാകാൻ കാരണം. മണൽനീക്കാൻ കൊണ്ടുവന്ന ചന്ദ്രഗിരി ഡ്രജ്ജറിന്റെ കേടുപാടുകൾ തീർക്കാനാകാത്തതും കടൽ പ്രക്ഷുബ്ധമായതും മണൽനീക്കം പാളി. കാലവർഷം ആരംഭിച്ചതോടെ അഞ്ചുതെങ്ങ് കായൽജലം മണൽത്തിട്ടകടന്ന് കടലിലേക്ക്‌ ഒഴുകാൻ തുടങ്ങിയതോടെ ചെറുവള്ളങ്ങൾ കടലിൽ പോയിത്തുടങ്ങി. ട്രോളിങ് നിരോധനം അവസാനിച്ചതോടെ കൂടുതൽ വള്ളങ്ങൾ മുതലപ്പൊഴിയിലൂടെ മീൻപിടിത്തത്തിന് പോകുന്നുണ്ട്. തിങ്കളാഴ്ച അപകടത്തിൽപ്പെട്ട വള്ളത്തിൽ എത്ര തൊഴിലാളികളുണ്ടായിരുന്നുവെന്നതുപോലും…
