Author: News Admin

വിതുര: മികച്ച പ്രാദേശിക ലേഖകനുള്ള പത്രാധിപർ കെ. സുകുമാരൻ സ്മാരക പുരസ്കാരത്തിന് കേരളകൗമുദി വിതുര ലേഖകൻ കെ. മണിലാലിനെ തിരഞ്ഞെടുത്തു. വർഷങ്ങളായി വിതുര പ്രാദേശിക ലേഖകനായി അർപ്പണബോധത്തോടെ പ്രവർത്തിക്കുന്ന മണിലാലിന്റെ വാർത്തകളോടുള്ള സമർപ്പണവും കൃത്യതയും ഉത്തരവാദിത്വവും പരിഗണിച്ചാണ് പുരസ്കാരം. ഡെസ്കിൽ നിന്ന് നിർദേശിക്കുന്ന വാർത്തകൾ കൃത്യസമയത്ത് ശേഖരിച്ച് ന്യൂസ്ട്രാക്കിലൂടെ അയയ്ക്കുന്നതിലും, വിതുരയ്ക്ക് പുറത്തുള്ള പ്രധാന വാർത്തകൾ ബന്ധപ്പെട്ട ലേഖകരെയും ഡെസ്കിനെയും അറിയിക്കുന്നതിലും അദ്ദേഹം പ്രത്യേക ശ്രദ്ധ പുലർത്തുന്നു. ഏത് സമയത്തും വാർത്താ ആവശ്യങ്ങളോട് ക്രിയാത്മകമായി പ്രതികരിക്കുകയും വിശദാംശങ്ങൾ ചോരാതെ വേഗത്തിൽ റിപ്പോർട്ട് ചെയ്യുകയും ചെയ്യുന്നതാണ് മണിലാലിന്റെ പ്രത്യേകത. സർക്കുലേഷൻ, പരസ്യ വിഭാഗങ്ങൾക്ക് നൽകുന്ന പിന്തുണയും പുരസ്കാരത്തിനായി പരിഗണിച്ചതായി കേരളകൗമുദി യൂണിറ്റ് ചീഫ് ആർ. ചന്ദ്രദത്ത് പറഞ്ഞു.

വർക്കല: വർക്കല നഗരസഭ തച്ചൻകോണം വയോമിത്രം യൂണിറ്റിന്റെ നേതൃത്വത്തിൽ വയോജനങ്ങൾക്കായി സംഘടിപ്പിച്ച വിനോദയാത്ര വേറിട്ട അനുഭവമായി. നഗരസഭ ചെയർപേഴ്സൺ ഗീതാ ഹേമചന്ദ്രൻ യാത്ര ഫ്ലാഗ് ഓഫ് ചെയ്തു. വ്യാഴാഴ്ച രാവിലെ എട്ടുമണിയോടെ വർക്കല താലൂക്ക് ഓഫീസിന് സമീപത്തുനിന്നാണ് വയോജനങ്ങൾ ഉൾപ്പെട്ട സംഘം യാത്ര തിരിച്ചത്.കൊല്ലം ജില്ലയിലെ മൺട്രോത്തുരുത്തിലേക്കായിരുന്നു യാത്ര. കൊല്ലത്ത് എത്തിയ സംഘം മൺട്രോത്തുരുത്ത് സന്ദർശിക്കുന്നതിനായി ബോട്ട് യാത്ര നടത്തുകയും ചെയ്തു. കായലുകളിലൂടെയും ജലാശയങ്ങളിലൂടെയുമുള്ള ബോട്ട് യാത്ര വയോജനങ്ങൾക്ക് ഏറെ ആസ്വാദ്യകരവും വേറിട്ട അനുഭവവുമായി. പ്രകൃതിഭംഗി ആസ്വദിച്ചും പരസ്പരം സൗഹൃദം പങ്കിട്ടുമാണ് സംഘം യാത്ര തുടർന്നത്. വയോജനങ്ങളുടെ മാനസിക ഉല്ലാസത്തിനും കൂട്ടായ്മ ശക്തിപ്പെടുത്തുന്നതിനും ലക്ഷ്യമിട്ടാണ് ബയോമിത്രം യൂണിറ്റിന്റെ നേതൃത്വത്തിൽ വിനോദയാത്ര സംഘടിപ്പിച്ചത്. ദിവസം മുഴുവൻ നീണ്ട യാത്രയ്ക്കുശേഷം വൈകുന്നേരം അഞ്ചുമണിയോടെ സംഘം വർക്കലയിൽ തിരിച്ചെത്തി. യാത്രയിൽ പങ്കെടുത്ത വയോജനങ്ങൾക്ക് മൺട്രോത്തുരുത്തിലേക്കുള്ള ബോട്ട് യാത്രയും അവിടത്തെ പ്രകൃതിദൃശ്യങ്ങളും പുതിയ അനുഭവമായി.

വർക്കല: ടെലിഫോൺ എക്സ്ചേഞ്ചിന് സമീപം ജിസിൻ ഭവനിൽ നാരായണൻ മകൻ ചന്ദ്രശേഖരൻ (76) നിര്യാതനായി. കെ.എസ്.ഇ.ബി.യിൽ നിന്ന് വിരമിച്ചയാളായിരുന്നു. ഭാര്യ: ജഗദമ്മ (റിട്ട. എസ്.എസ്.എൻ.എം.എം.എച്ച്.). മക്കൾ: ജിസിൻ, ജിഷ (Late), ജിൻസി. ഒരു ചെറുമകളുമുണ്ട്. സംസ്കാരം സെപ്റ്റംബർ 17ന് ഉച്ചയ്ക്ക് 12ന് നടക്കും.

അഞ്ചുതെങ്ങ്: പവർകട്ടിനിടെ കപാലീശ്വരം ക്ഷേത്രത്തിന് സമീപത്തെ ട്രാൻസ്‌ഫോർമറിൽനിന്ന് ത്രീഫേസ് സപ്ലൈയിലെ ഒരു ഫ്യൂസ് കേരിയർ കാണാതായി. സെപ്തംബർ 15 ന് രാത്രി 8.25 മുതൽ 8.50 വരെ പ്രദേശത്ത് വൈദ്യുതി മുടങ്ങിയിരുന്നു. ഇതിനിടെയാണ് കപാലീശ്വരം ക്ഷേത്രത്തിന് സമീപത്തെ ട്രാൻസ്‌ഫോർമറിൽനിന്ന് ഫ്യൂസ് കേരിയർ നഷ്ടമായത്. പവർകട്ട് അവസാനിച്ച് വൈദ്യുതി പുനഃസ്ഥാപിച്ചിട്ടും പ്രദേശത്തെ വിവിധ ഉൾപ്രദേശങ്ങളിൽ വൈദ്യുതി ലഭിക്കാതായതോടെയാണ് നാട്ടുകാർ കടയ്ക്കാവൂർ കെ.എസ്.ഇ.ബി ഓഫീസിലേക്ക് കൂട്ടമായി വിളിച്ചത്. തുടർന്ന് വൈദ്യുതി തടസ്സത്തിന്റെ കാരണം പരിശോധിക്കുന്നതിനായി കെ.എസ്.ഇ.ബി ഉദ്യോഗസ്ഥർ സ്ഥലത്തെത്തി. പരിശോധനയിലാണ് ട്രാൻസ്‌ഫോർമറിലെ ഫ്യൂസ് കേരിയർ നഷ്ടപ്പെട്ടതായി കണ്ടെത്തിയത്. സംഭവത്തിൽ കൂടുതൽ പരിശോധനകൾ നടന്നുവരികയാണ്.

ഇടവ: ഇടവയിലെ എഴുത്തുകാരുടെ പുസ്തകങ്ങൾ ശേഖരിച്ച് സ്കൂൾ ലൈബ്രറിയിൽ പ്രത്യേകമായി സജ്ജീകരിക്കുന്ന ‘ഇടവ ഇടം’ പദ്ധതിക്ക് ഇടവ എം.ആർ.എം.കെ.എം.എം. ഹയർ സെക്കൻഡറി സ്കൂളിൽ തുടക്കമായി.കവി അജീർ കുട്ടിയിൽനിന്ന് പുസ്തകങ്ങൾ ഏറ്റുവാങ്ങി തിരുവനന്തപുരം ജില്ലാ പഞ്ചായത്ത് പ്രസിഡന്റ് വി. പ്രിയദർശനി പദ്ധതി ഉദ്ഘാടനം ചെയ്തു. സ്കൂൾ റീഡേഴ്സ് ക്ലബ്ബിന്റെ ആഭിമുഖ്യത്തിൽ സംഘടിപ്പിച്ച ചടങ്ങിൽ ഇടവ ഗ്രാമപഞ്ചായത്ത് പ്രസിഡന്റ് റീതു മോഹൻ അധ്യക്ഷയായി.എം.എസ്. ജലീൽ, രാജീവ് ജി. ഇടവ, സഫി ഓടയം, ഇടവ സാഗർ, അൻസാർ വർണ്ണന, വെങ്കുളം തുളസി, പ്രമോദ് കുഴിമതിക്കാട്, സ്കൂൾ പ്രിൻസിപ്പൽ സീന എൽ.കെ., ഹെഡ്മിസ്ട്രസ് ഷൈബ എസ്., സ്റ്റാഫ് സെക്രട്ടറി പ്രവീൺ എന്നിവർ സംസാരിച്ചു. ഇടവയിലെ എഴുത്തുകാരുടെ പുസ്തകങ്ങൾ ഒരിടത്ത് ശേഖരിച്ച് വിദ്യാർഥികൾക്ക് പരിചയപ്പെടുത്തുന്നതിനും പ്രാദേശിക സാഹിത്യസൃഷ്ടികൾ സംരക്ഷിക്കുന്നതിനുമാണ് ‘ഇടവ ഇടം’ പദ്ധതി ഒരുക്കുന്നത്.

നാവായിക്കുളം: പ്രധാനമന്ത്രി നരേന്ദ്ര മോദിയുടെ ജന്മദിനാഘോഷങ്ങളുടെ ഭാഗമായി ബി.ജെ.പി. നാവായിക്കുളം മണ്ഡലം കമ്മിറ്റിയുടെ നേതൃത്വത്തിൽ ഒരു മാസം നീളുന്ന ‘സേവാ സങ്കൽപ് അഭിയാൻ’ പരിപാടികൾക്ക് തുടക്കമായി. മണ്ഡലത്തിലെ വിവിധ ക്ഷേത്രങ്ങളിൽ പ്രധാനമന്ത്രി നരേന്ദ്ര മോദിയുടെ ദീർഘായുസിനായി പൂജകൾ നടത്തിയാണ് പരിപാടികൾക്ക് തുടക്കമിട്ടത്. തുടർന്ന് വടശ്ശേരിക്കോണം പോസ്റ്റ് ഓഫീസിൽനിന്ന് പ്രധാനമന്ത്രിക്ക് ആശംസാകാർഡ് അയച്ചു. ഒറ്റൂർ ബ്ലോക്ക് ഡിവിഷൻ സ്ഥാനാർഥി ആർ. ഷൈല പരിപാടി ഉദ്ഘാടനം ചെയ്തു. ബി.ജെ.പി. നാവായിക്കുളം മണ്ഡലം പ്രസിഡന്റ് പൈവേലിക്കോണം ബിജുവിന്റെ അധ്യക്ഷതയിലായിരുന്നു പരിപാടി. ആറ്റിങ്ങൽ മണ്ഡലം പ്രസിഡന്റ് സ്വരാജ്, നാവായിക്കുളം മണ്ഡലം ജനറൽ സെക്രട്ടറിമാരായ സബീൻ കണിമംഗലം, രാജീവ് ഐ.ആർ. എന്നിവർ പരിപാടികൾക്ക് നേതൃത്വം നൽകി. ജനപ്രതിനിധികളായ ശശീന്ദ്രൻ തച്ചോട്, നയന, ലെനിൻ, ബി.ജെ.പി. നേതാക്കളായ സുദേവൻ, തോഫൽ ശിവരാമൻ, ഷാൻ മഠത്തിൽ, ശാലിനി, അർച്ചന, കല കോവൂർ, മഞ്ജു, സുഷമ, ജോയി വലിയവിള എന്നിവരും പങ്കെടുത്തു. ഒക്ടോബർ 17 വരെ മണ്ഡലം കമ്മിറ്റിയുടെ നേതൃത്വത്തിൽ വിവിധ ജനക്ഷേമപരമായ…

തിരുവനന്തപുരം: കേരള ജേണലിസ്റ്റ് യൂണിയൻ (കെ.ജെ.യു.) സ്ഥാപക നേതാക്കളിൽ പ്രമുഖനായിരുന്ന യു. വിക്രമൻ സാറിന്റെ മൂന്നാം ചരമവാർഷികത്തോടനുബന്ധിച്ച് അനുസ്മരണയോഗം സെപ്റ്റംബർ 21ന് നടക്കും. തിരുവനന്തപുരം പ്രസ് ക്ലബ്ബിൽ രാവിലെ 10.30നാണ് പരിപാടി. തലസ്ഥാനത്തെ തലമുതിർന്ന പത്രപ്രവർത്തകനായിരുന്ന യു. വിക്രമൻ, കമ്യൂണിസ്റ്റ് സൈദ്ധാന്തികൻ സി. ഉണ്ണിരാജയുടെ മകനും സി.പി.ഐ. നേതാവുമായിരുന്നു. ജനയുഗം റിപ്പോർട്ടർ, കോ-ഓർഡിനേറ്റിങ് എഡിറ്റർ, നവയുഗം പത്രാധിപസമിതി അംഗം എന്നീ നിലകളിലും അദ്ദേഹം പ്രവർത്തിച്ചു. കേരള പത്രപ്രവർത്തക യൂണിയൻ തിരുവനന്തപുരം ജില്ലാ സെക്രട്ടറി, പ്രസിഡന്റ്, സീനിയർ ജേണലിസ്റ്റ് യൂണിയൻ ഭാരവാഹി, ഇന്ത്യൻ ജേണലിസ്റ്റ് യൂണിയൻ ദേശീയ സെക്രട്ടറി, വൈസ് പ്രസിഡന്റ് എന്നീ നിലകളിലും അദ്ദേഹം പ്രവർത്തിച്ചിട്ടുണ്ട്. കേരള ജേണലിസ്റ്റ് യൂണിയന്റെ സ്ഥാപക പ്രസിഡന്റായിരുന്ന അദ്ദേഹം പ്രോഗ്രസീവ് റൈറ്റേഴ്സ് അസോസിയേഷൻ, യുവകലാസാഹിതി തുടങ്ങിയ സംഘടനകളുടെ ജില്ലാ ഭാരവാഹിയായും പ്രവർത്തിച്ചു. മാധ്യമപ്രവർത്തകരുടെ ക്ഷേമത്തിനും അവകാശങ്ങൾക്കുമായി ജീവിതകാലം മുഴുവൻ പ്രവർത്തിച്ച വ്യക്തിത്വമായിരുന്നു യു. വിക്രമനെന്ന് സംഘാടകർ അനുസ്മരിച്ചു. അദ്ദേഹത്തിന്റെ ഓർമകൾ നിറഞ്ഞുനിൽക്കുന്ന തിരുവനന്തപുരം പ്രസ് ക്ലബ്ബിലാണ്…

കല്ലമ്പലം: മടന്തപച്ചയിൽ മുംതാസ് മഹലിൽ ബദറുദ്ദീൻ (80) നിര്യാതനായി. മന്നാനിയ്യാ യു.എ.ഇ. കമ്മിറ്റിയുടെ പ്രസിഡന്റായി ദീർഘകാലം പ്രവർത്തിച്ചിട്ടുണ്ട്. ഭാര്യ: സുഹറ ബീവി. മക്കൾ: നിസാമുദ്ദീൻ (അബുദാബി), നാസിമുദ്ദീൻ (റാസൽഖൈമ), മുംതാസ് ബീഗം, നിയാസ് (അബുദാബി). മരുമക്കൾ: ആമിന, ലബ്‌ന, ഉബൈദ് (ദുബൈ), ഫൗസിയ. ദക്ഷിണ കേരള ജംഇയ്യത്തുൽ ഉലമാ ജനറൽ സെക്രട്ടറി തൊടിയൂർ മുഹമ്മദ് കുഞ്ഞ് മൗലവി, വിദ്യാഭ്യാസ ബോർഡ് സെക്രട്ടറി പാങ്ങോട് ഖമറുദ്ദീൻ മൗലവി, കേരള മുസ്‌ലിം ജമാഅത്ത് ഫെഡറേഷൻ ഓർഗനൈസിങ് സെക്രട്ടറി കടയ്ക്കൽ ജൂനൈദ് എന്നിവർ പരേതന്റെ വസതിയിലെത്തി അനുശോചനം രേഖപ്പെടുത്തി.

വർക്കല ∙ ചായക്കടയിൽ ബജിക്കും സോസിനും വാങ്ങിയതിനെച്ചൊല്ലിയുണ്ടായ തർക്കത്തിനു പിന്നാലെ മണിക്കൂറുകൾക്കകം മാരകായുധങ്ങളുമായി തിരിച്ചെത്തി ജീവനക്കാരനെ ആക്രമിച്ച കേസിൽ 3 പേർ അറസ്റ്റിൽ. കൊല്ലം മുണ്ടയ്ക്കൽ ഈസ്റ്റ് കടപ്പുറം കാച്ചിക്കടവ് അലക്സ് ഭവനിൽ അലക്സാണ്ടർ (29), ഇരവിപുരം തെക്കുംഭാഗം കുറ്റൂർ പടിഞ്ഞാറ്റതിൽ ഫിനോൾഡ് (24), മയ്യനാട് താന്നി മദർ തെരേസ നഗർ ജോബിൻവില്ലയിൽ ജോബിൻ (26) എന്നിവരെയാണ് അയിരൂർ പൊലീസ് അറസ്റ്റ് ചെയ്തത്. വർക്കല മാന്തറ ക്ഷേത്രത്തിനു സമീപം താമസിക്കുന്ന അഫ്സലിനാണ് പരുക്കേറ്റത്. സഹോദരി അസീന നടത്തുന്ന കാപ്പിൽ ബീച്ചിലെ ചായക്കടയിൽ സഹായിയായി ജോലി ചെയ്യുകയായിരുന്നു. ഞായറാഴ്ച ഉച്ചയ്ക്ക് 3 മണിയോടെ ഇന്നോവ കാറിലെത്തിയ മൂന്നംഗ സംഘം കടയിൽനിന്ന് ബജിയും സോസും വാങ്ങിയതോടെയാണ് തർക്കം തുടങ്ങിയത്. സോസ് കുറഞ്ഞുപോയെന്നാരോപിച്ച് സംഘം ബഹളം വച്ചതിനെ തുടർന്ന് അഫ്സൽ വീണ്ടും സോസ് നൽകി. എന്നാൽ സോസ് തറയിൽ ഒഴിച്ചശേഷം വീണ്ടും ആവശ്യപ്പെട്ടതോടെ തർക്കം രൂക്ഷമായി. സോസ് ഇനി നൽകില്ലെന്ന് പറഞ്ഞതിലുള്ള വിരോധമാണ് പിന്നീട് ആക്രമണത്തിൽ…

വർക്കല: മുത്താനയിൽ പ്രജി (35) എന്ന യുവാവിനെ കുത്തിക്കൊലപ്പെടുത്തിയ കേസിലെ മുഖ്യപ്രതികളെ സംഭവസ്ഥലത്തെത്തിച്ച് പോലീസ് തെളിവെടുപ്പ് നടത്തി. കേസിലെ പ്രതികളായ ഗൗരികൃഷ്ണൻ (19), അമ്പാടി (20) എന്നിവരെയാണ് മൂന്ന് ദിവസത്തേക്ക് പോലീസ് കസ്റ്റഡിയിൽ വാങ്ങി തെളിവെടുപ്പിനായി എത്തിച്ചത്. ചൊവ്വാഴ്ച വൈകിട്ട് 5.45 ഓടെ വർക്കല ഡിവൈ.എസ്.പി. രമേഷ് കുമാറിന്റെ നേതൃത്വത്തിലുള്ള വൻ പോലീസ് സന്നാഹത്തോടെയാണ് പ്രതികളെ കൊലപാതകം നടന്ന സ്ഥലത്ത് എത്തിച്ചത്. കല്ലമ്പലം, വർക്കല പോലീസ് സ്റ്റേഷനുകളിൽ നിന്നുള്ള അഞ്ച് വാഹനങ്ങളുടെ അകമ്പടിയോടെയായിരുന്നു പോലീസ് സംഘം സ്ഥലത്തെത്തിയത്. പോലീസിന്റെ ചോദ്യം ചെയ്യലിൽ കൊലപാതകവുമായി ബന്ധപ്പെട്ട കാര്യങ്ങൾ പ്രതികൾ വിശദീകരിച്ചു. തെളിവെടുപ്പ് നടക്കുന്നതറിഞ്ഞ് സ്ത്രീകളും കുട്ടികളും ഉൾപ്പെടെ നിരവധി പ്രദേശവാസികൾ സ്ഥലത്ത് തടിച്ചുകൂടി. കൊല്ലപ്പെട്ട പ്രജിയുടെ ബന്ധുക്കൾ പ്രതികൾക്കെതിരെ പ്രതിഷേധിക്കുകയും അലറിവിളിക്കുകയും ചെയ്തു. മേശപ്പണി ചെയ്ത് കുടുംബം പുലർത്തിയിരുന്ന പ്രജി വിവാഹിതനും നാലും രണ്ടും വയസ്സുള്ള രണ്ട് കുട്ടികളുടെ പിതാവുമായിരുന്നു.വേഗത്തിൽ തെളിവെടുപ്പ് നടപടികൾ പൂർത്തിയാക്കിയ പോലീസ് പ്രതികളുമായി സ്ഥലത്തുനിന്ന് മടങ്ങി. കൊലപാതകവുമായി ബന്ധപ്പെട്ട…